O´Sullivan fór hamförum og vann Masters-mótið

Snókerspilarinn Ronnie O´Sullivan var sannarlega í essinu sínu í kvöld þegar hann tryggði sér sigur á Masters-mótinu á Wembley með því að rúlla Kínverjanum Ding upp í úrslitum 10-3. Sexfaldur heimsmeistari Steve Davis afhenti O´Sullivan sigurlaunin eftir leikinn og kallaði þetta einhverja bestu frammistöðu sem hann sjálfur hefði orðið vitni að.

Ding náði sér aldrei á strik í einvíginu og gekk út úr salnum þegar skammt var eftir af leiknum og kvartaði yfir því að menn í salnum væru að trufla sig. Sullivan elti hann uppi og náði að stappa stálinu í mótherja sinn svo hann sneri aftur til leiks, en allt kom fyrir ekki.