Norman dustar rykið af kylfunum

“Hvíti hákarlinn” eða hinn gamalreyndi ástralski kylfingur Greg Norman hefur boðað þáttöku sína á Dubai-Classic mótinu í golfi sem fram fer í næsta mánuði. Tilkynning Norman kemur mikið á óvart, enda hefur hann að mestu einbeitt sér að eigin viðskiptum á síðustu misserum og lítið sem ekkert keppt á opinberum vettvangi.

Norman segir að það hafi verið töfrar Dubai sem urðu til þess að hann ákvað að dusta rykið af kylfunum. Hinn 51 árs gamli Norman, fyrrum fremsti kylfingur heims, segist ekki hafa gleymt neinu í íþróttinni og stefnir að góðum árangri á mótinu.

“Enginn staður í heiminum býr yfir eins góðum anda og Dubai,” sagði Norman. Mótaskipuleggjendur í Dubai er eðlilega hinir ánægðustu með ákvörðun Norman en áður höfðu kylfingar á borð við Tiger Woods, sem á titil að verja á mótinu, Ernie Els og Colin Montgomery boðað komu sína á mótið.