Áhrif frá Jackson

Gareth Pugh hefur vakið mikla athygli fyrir íburðarmiklar flíkur og brjálaðar tískusýningar. Hann vakti strax athygli þegar hann útskrifaðist frá Central Saint Martins en hann segir það mjög erfitt að komast áfram í tískubransanum. „Ég held að fólk kalli útskriftarsýningar „lokasýningar" vegna þess að það er síðasta sýning sem nemandinn mun gera!" sagði hann í gríni og átti við hversu erfitt er að gera þá næstu.

„Ég ber mikla virðingu fyrir öllum þeim sem komast áfram í þessum bransa. Það er erfitt að vera í London en ég get samt ekki verið neins staðar annars staðar."



Aðspurður hvað það sé sem dragi hann að hinu skrítna og dimma sem einkennir hönnun hans segir hann: „Þetta er bara stíll sem höfðar til mín. Það er gaman að sjokkera fólk svolítið. Það er samt mjög auðvelt að stílísera sýningu á þennan hátt en þegar maður skoðar fötin ein og sér þá eru þau í raun mjög klæðileg," sagði Pugh og bætti því við að fyrir næstu sýningu hefði hann meðal annars sótt áhrif í Michael Jackson. „Ég elska þessa glitrandi hanska!"