Guðdómlegt góðgæti

Hér er einföld og fljótleg uppskrift að súkkulaði sem er ekki bara gott heldur beinlínis hollt.

Súkkulaði

1 bolli kaldpressuð kókosolía

½ bolli agave-síróp

1 bolli kakóduft (helst lífrænt)

Látið heitt vatn renna á kókosolíukrukkuna í smástund, svo að olían verði fljótandi og hellið henni síðan í skál. Hellið agave-sírópinu út í og hrærið saman. Sigtið síðan kakóduftið út í og hrærið öllu saman. Setjið hræruna í lítil klakabox eða önnur mót og stingið þeim inn í ísskáp.

Einnig er hægt að búa til súkkulaðiegg með því að smyrja blöndunni inn í páskaeggjamót. Þunnt lag er þá sett í einu í formin og þeim stungið inn í ísskáp/frysti á milli til að láta súkkulaðið storkna. Hægt er að setja út í blönduna vanillu, myntu, hnetur, rúsínur og hvað annað sem hugurinn girnist til að auka og bæta bragðið.

Kakóbaunirnar eru stundum kallaðar fæða guðanna því þær eru fullar af heilsusamlegum efnum.