Sólarljóð í myndum

Listmálarinn, blaðamaðurinn, ritstjórinn og ferðabókahöfundurinn Gísli Sigurðsson hefur gefið Garðabæ, þar sem hann býr, myndröð eftir sjálfan sig sem gerð er eftir Sólarljóðum.

Verður opnuð sýning á gjöfinni í dag af Gunnari Einarssyni bæjarstjóra kl. 15 í félagsmiðstöðinni Garðabergi.

Myndröðin byggist á efni úr Sólarljóðum. Í Sólarljóðum segir höfundurinn frá dauða sínum og því þegar sólin hverfur honum og sortnar, en áfram heldur ferðin. Málverkaröðin var sýnd á einkasýningu Gísla Sigurðssonar á Kjarvalsstöðum árið 1986.

Þessi veglega gjöf Gísla verður til sýnis í félagsmiðstöðinni Garðabergi, Garðatorgi 7 (á hæðinni fyrir ofan bókasafnið), út janúar 2007.

Garðaberg er opið virka daga (nema þriðjudaga) frá kl. 12.30- 16.30 og allir eru velkomnir þar inn að skoða sýninguna.