Ungur viðskiptajöfur stöðvaður

Þrettán ára danskur drengur er lögreglunni gramur fyrir að stöðva viðskiptaferil sinn með skjótum hætti, í gær. Lögreglan réðst til inngöngu í vöruhús drengsins, á Suður-Jótlandi, og gerði allan lagerinn upptækan. Foreldrarnir gerðu ekki athugasemdir við aðgerðir lögreglunnar.

Það kemur kannski til af því að hinn þrettán ára upprennandi viðskiptajöfur var að selja rakettur og annað sprengiefni í kjallara heimilisins, án þess að foreldrarnir hefðu hugmynd um. Lögreglan segir að þar hafi verið nóg sprengiefni til þess að jafna húsið við jörðu.