Við höfum engu að tapa

Rafa Benitez, stjóri Liverpool, segir að sínir menn hafi engu að tapa í 16-liða úrslitum meistaradeildarinnar eftir að ljóst var að liðið myndi mæta Eiði Smára og félögum í Barcelona í næstu umferð.

"Við vitum að Barcelona er frábært lið og að þetta verða mjög erfiðir leikir fyrir okkur, enda eru þeir núverandi Evrópumeistarar. Við höfum hinsvegar tvo mánuði til að undirbúa okkur fyrir leikinn og höfum engu að tapa.

Allir eru á þeirri skoðun að Barcelona sé eitt af bestu liðum Evrópu og við verðum að reyna að afsanna það. Okkur hlakkar öllum til að mæta Barcelona og við verðum að vera tilbúnir andlega til að mæta mjög sterkum hópi leikmanna þeirra. Ég hef áður spilað á Nou Camp þegar ég stýrði Valencia og þá náði ég ágætum árangri þar svo ég vona að það haldi áfram. Það sem mestu máli skiptir er að fá síðari leikinn á Anfield og ef við náum góðum úrslitum á Spáni er aldrei að vita hvað við getum gert heima í síðari leiknum," sagði Benitez.