Innlent

Eignir lífeyrissjóðanna nálgast 1500 milljarða

Eignir lífeyrissjóðanna námu 1.425 milljörðum króna í lok október og jukust um tæpa níu miljarða í mánuðinum. Frá þessu er greint í Morgunkorni Glitnis og vísað í tölur Seðlabankans.

Þar er enn fremur sagt að alls hafi eignir lífeyrissjóðanna aukist um 205 milljarða króna á árinu og að gera megi ráð fyrir að eignir sjóðanna í lok árs verði um 130 prósent af landsframleiðslu.

Segir Glitnir hlutfallið mjög hátt í alþjóðlegum samanburði og að Ísland hafi með hæsta hlutfallið af OECD-löndunum í hitteðfyrra.

Bent er á breytta fjárfestingarstefnu lífeyrissjóðanna en þeir fjárfesta nú í auknum mæli í hlutabréfum og erlendum verðbréfum í stað ríkistryggðra skuldabréfa og sjóðsfélagalána áður fyrr.

„Fjárfesting í hlutabréfum árið 1990 var um 1% en er nú rúmlega 37%. Eignir sjóðanna í erlendum verðbréfum nema nú um 27% en voru ekki nema 2% árið 1995," segir í Morgunkorni Glitnis.

Viðskipti

Mest lesið


Fleiri fréttir

Sjá meira


×

Mest lesið