Hvalaskoðun fái það vægi sem henni beri

Hvalir og hvalaðskoðun eru meðal þess sem erlendum ferðamönnum er efst í huga eftir dvöl sína á Norðurlandi samkvæmt könnun sem fyrirtækið Rannsóknir og ráðgjöf ferðaþjónustunnar vann fyrir Ferðamálaklasa Norðurlands. Af þeim sem sögðust hafa komið í landshlutann nefndu flestir, eða um fjórðungur, hvalina en þar á eftir kom Mývatn og náttúran almennt.

Ferðamálasamtök Norðurlands eystra segja að þessar niðurstöður styðji þann málflutning ferðaþjónustunnar að hvalir og hvalaskoðun séu eitt helsta aðdráttaraflið fyrir fjölmörg ferðaþjónustufyrirtæki á landinu.

Í tilkynningu frá samtökunum er þess krafist að stjórnvöld taki niðurstöðurnar alvarlega og að atvinnugreinin fái það vægi sem henni ber samkvæmt skoðunum þeirra ferðamanna sem landsvæðið heimsækja.