Alvarlegum slysum fjölgar

Alvarlegum slysum hér á landi hefur fjölgað um 43,6% á fyrstu níu mánuðum ársins. Alls hafa tuttugu og fimm látist í tuttugu og þremur banaslysum á árinu. Allt árið í fyrra létust nítján manns í umferðarslysum.

Á fyrstu níu mánuðum ársins hafa hundrað og tuttugu manns slasast í rúmlega hundrað alvarlegum umferðarslysum. Þrjú algengustu slysin voru fall af bifhjóli, ekið út af vinstra megin og ekið út af hægra megin. Til samanburðar má geta þess að í fyrra varð 71 alvarlegt slys fyrstu 9 mánuði ársins. Umferðarstofa telur þróun slysa á árinu alvarlega og að brýnt sé að bregðast við með sértækum ráðstöfunum.