Gerir tilkall til sætis í byrjunarliði Real

David Beckham þótti senda þjálfara sínum Fabio Capello hjá Real Madrid ákveðin skilaboð í gær þegar hann skoraði mark og lék mjög vel í auðveldum sigri Real á Ecija í bikarkeppninni í gær. Beckham hefur ekki náð að vinna sér sæti í byrjunarliðinu það sem af er leiktíðinni.

"Mér leið mjög vel í gær og ég er í eins góðu formi og ég hef verið í á ferlinum," sagði hinn 31 árs gamli fyrrum fyrirliði enska landsliðsins eftir leikinn. "Ég hef ekki fengið að spila mikið undanfarið og því hef ég verið að æfa aukalega heima hjá mér svo ég sé í sem allra bestu formi og ég held að ég gæti spilað alla leiki sem völ er á í dag þess vegna. Það er í mínu valdi að sanna það að ég eigi heima í byrjunarliðinu og það kostar mikla vinnu - vinnu sem ég er tilbúinn að leggja á mig," sagði Beckham og bætti því við að hann og kona hans æfðu saman heima hjá sér á kvöldin.