Grönholm á enn veika von

Finnski ökuþórinn Marcus Grönholm á enn veika von um að verða heimsmeistari í rallakstri eftir að þessi magnaði ökumaður vann sig upp í 7. sæti á öðrum keppnisdegi Ástralíurallsins í dag með því að vinna fimm sérleiðir.

Grönholm verður að ná fjórða sæti eða ofar til að eiga möguleika á að hrifsa titilinn af Sebastien Loeb frá Frakklandi, en Grönholm ók sem óður væri í dag til að vinna upp tíma eftir að hafa velt bíl sínum í gær.

Landi hans Mikko Hirvonen er enn í fyrsta sæti keppninnar og er með 32 sekúndna forskot á Petter Soberg sem er í öðru sæti.