Kaupþing gefur út skuldabréf í Japan

Kaupþing gaf í dag út svokölluð Samurai skuldabréf í Japan fyrir samtals 50 milljarða japanskra jena eða 29 milljarða íslenskra króna. Þetta er fyrsta skuldabréfaútgáfa Kaupþings banka í Japan.

Í tilkynningu frá bankanum til Kauphallar Íslands segir að skuldabréfin séu gefin út til þriggja ára og bera 1,8 prósenta fasta vexti eða sem nemur 75 punktum yfir 3 ára föstum vöxtum í Japan. Umframeftirspurn var eftir bréfunum en fjárfestar óskuðu eftir því að kaupa skuldabréf fyrir rúmlega 75 milljarða jena og var því ákveðið að stækka skuldabréfaútgáfuna úr 20 milljörðum jena, eins og gert var ráð fyrir í upphafi, í 50 milljarða jena eða 29 milljarða krónur. Skuldabréfin voru seld til fjölbreytts hóps japanskra fagfjárfesta, en 63 fjárfestar tóku þátt í útboðinu.

Í tilkynningunni segir að á undanförnum mánuðum hafi mikil áhersla verið lögð á að dreifa fjármögnun bankans og því hafi verið markvisst unnið að útgáfu skuldabréfa á nýjum mörkuðum til að breikka fjárfestahópinn.

Haft er eftir Guðna Aðalsteinssyni, framkvæmdastjóra Fjárstýringar Kaupþings, að viðtökurnar séu sérlega ánægjulegar og megi gera ráð fyrir að skuldabréfaútgáfur í Japan verði framvegis reglulegur hluti af endurfjármögnun bankans.

Umsjónaraðilar með útgáfunni voru Daiwa Securities SMBC og Nomura Securities Co Ltd.