Starfsmannastjóri Ford segir upp

Steven Hamp, starfsmannastjóri bandaríska bílaframleiðandans Ford og næstráðandi Alan Mulally, forstjóra, ætlar að láta af störfum hjá fyrirtækinu öðru hvoru megin við næstu áramót. Hamp varð starfsmannastjóri Ford í nóvember á síðasta ári undir stjórn Bill Ford, fráfarandi forstjóra, en þeir Hamp eru mágar. Ford hefur ekki tilgreint um brotthvarf Hamps frá fyrirtækinu með formlegum hætti en Tom Hoyt, talsmaður fyrirtækisins, staðfesti uppsögnina í samtali við fréttastofuna Associated Press. Ekki liggur fyrir nákvæmlega hvenær Hamp lætur af störfum né hvað hann hyggst taka sér fyrir hendur. Þá hefur bílaframleiðandinn ekki ráðið í stöðu hans.