Nýr aðstoðarforstjóri XL Leisure Group

Magnús Stephensen hefur tekið við stöðu aðstoðarforstjóra XL Leisure Group, dótturfyrirtækis Avion Group. Magnús hefur gegnt starfi framkvæmdastjóra Viðskiptaþróunar Avion Group frá stofnun félagsins.

Í tilkynningu frá Avion Group segir að Magnús er 33 ára og er menntaður í hagfræði og alþjóða viðskiptum frá University of Colorado. Magnús er í sambúð með Bergljótu Þorsteinsdóttur og eiga þau saman 3 syni.

Phil Wyatt verði áfram forstjóri XL Leisure Group.

 

Þá segir að XL Leisure Group sé ný sameinuð afkomueining innan Avion Group og tekur til dótturfélaga innan Avion Group í þremur heimsálfum. Félögin starfa öll á sviði leiguflugs og  ferðaheildsölu og þjónusta ferðaskrifstofur víðs vegar um heim. Mestu umsvif hinnar nýstofnuðu samsteypu eru í Evrópu en XL Leisure Group hefur innan sinnan vébanda fyrirtæki sem ráða yfir flugrekstrarleyfum í sex löndum og býður samsteypan upp á flug til yfir eitt hundrað áfangastaða í öllum byggðum heimsálfum. Áætlanir XL Leisure Group gera ráð fyrir veltu upp á tvo milljarða bandaríkjadala miðað við heilt rekstrarár.

 

Innan XL Leisure Group eru dótturfyrirtæki Avion Group; Excel Airways Group, Star Europe og Star Airlines og jafnframt 19% eignarhlutur í Extra Airways í Bandaríkjunum og 5% eignarhlutur í Advent Air sem rekur flugfélagið Skywest í Ástralíu.