Þinglýstum kaupsamningum fækkar mikið milli ára

Þinglýstum kaupsamningum á höfuðborgarsvæðinu fækkaði um ríflega 46 prósent í ágúst síðastliðnum miðað við sama mánuð í fyrra. Þetta kemur fram í tölum Fasteignamats ríkisins. Þar kemur einnig fram að velta í ágúst hafi dregist saman um tæp 35 prósent miðað við sama mánuð í fyrra. Nam hún 12 milljörðum í nýliðnum mánuði í alls 415 kaupsamningum. Þinglýstum samningum fækkaði einnig milli júlí og ágúst á þessu ári, um rúm 15 prósent og þá dróst veltan saman um 2,7 prósent milli mánaðanna.