Tyrkir létu jarðskjálfta ekki hafa áhrif á sig

Það verða Tyrkir og Frakkar sem keppa um fimmta sætið á HM í körfubolta eftir leiki dagsins á mótinu í Japan. Tyrkir lögðu Litháa 95-84 í framlengdum leik, þar sem jarðskjálfti upp á 4,8 á Richter skók höllina í hálfleik og Frakkar lögðu Þjóðverja síðar í dag 75-73 þar sem Mickael Gelabale skoraði sigurkörfuna í lokin. Joseph Gomis skoraði 22 stig fyrir Frakka en Dirk Nowitzki skoraði 29 stig fyrir Þjóðverja, þar af 21 í síðari hálfleik.

Það verða því Frakkar og Tyrkir sem spila um 5. sætið á HM og Þjóðverjar og Litháar berjast um 7. sætið, en þessir leikir fara fram á laugardag. Á morgun mætast Bandaríkjamenn og Grikkir annarsvegar og Spánverjar og Argentínumenn hinsvegar í undanúrsitum mótsins og úrslitaleikurinn fer fram á sunnudag.