Viss um að verða dæmdur saklaus

Bandaríski spretthlauparinn Justin Gatlin segist viss um að hann verði dæmdur saklaus af því að hafa fallið á lyfjaprófi á dögunum, en hann var í kjölfarið dæmdur í átta ára keppnisbann. Gatlin hefur gefið út yfirlýsingu þar sem hann sver að hafa ekki vísvitandi neytt steralyfja sem urðu þess valdandi að hann féll á sínu öðru lyfjaprófi á ferlinum.

"Ég hef alla tíð sett fullt traust á það fólk sem ég hef unnið með og það kerfi sem ég hef unnið eftir. Ég hef aldrei notað ólögleg efni eða látið neinn gefa mér ólögleg efni af fúsum og frjálsum vilja, ég er ekki þannig maður. Ég reikna fastlega með því að rannsókn eigi eftir að sanna sakleysi mitt," sagði Gatlin í yfirlýsingu sinni.