Telepathetics með breiðskífu

Frumburður íslensku hljómsveitarinnar The Telepathetics verður fáanlegur í öllum helstu verslunum landsins mánudaginn 24.júlí. Telepathetics vöktu óvænta athygli síðasta sumar þegar einn þekktasti umboðsmaður Bretlands, Alan McGee, sá þá spila á Íslandi og bauð þeim til London að spila. Alan McGee hefur meðal annars uppgvötað Oasis, The Libertines og Primal Scream.

Sveitin hefur getið sér gott orð sem mjög öflug tónleikasveit, og er enginn svikinn um frábæra skemmtun þegar drengirnir koma fram. Spilar raddsamspil söngvaranna Eyþórs og Hlyns þar stórt hlutverk.

Plata drengjanna í The Telepathetics ber heitið Ambulance og er þeirra eigin útgáfa. Platan inniheldur 10 lög, þar á meðal lagið "Castle" sem vakti nokkra athygli í fyrra á rokkútvarpstöðvum landsins og einnig lagið "Last Song" sem er komið í spilun á rás2, Xfm & X-inu og er það í stanslausri spilun eins og náði 9. sæti á x-dominos lista X-fm. Fólk má eiga vona á að sjá nýtt glæsilegt myndband við lagið Last Song í spilun í vikunni.

Platan var unnin að fullu í Sundlauginni, upptökuheimili Sigur Rósar. Birgir Jón Birgisson sá um upptökustjórn/hljóðblöndun, en hann hefur unnið með Sigur Rós undanfarið við gerð platna þeirra drengja. Tónlistarmaðurinn Pétur Þór Benediktsson eða Pétur Ben annaðist strengjaútsetningar í 2 lögum á plötunni, en Pétur hefur starfað með listamönnum á borð við Nick Cave og Mugison.

Framundan hjá strákunum er svo stanslaust tónleikaspil og eru næstu bókuðu tónleikar á "Frönskum dögum" á Fáskrúðsfirði 28.júlí.

Frekari upplýsingar má finna á www.telepathetics.com & www.myspace.com/telepathetics