Samningur Brown framlengdur hjá Cleveland

Forráðamenn Cleveland Cavaliers hafa ákveðið að Mike Brown verði áfram aðalþjálfari liðsins eftir að hann leiddi það til 50 sigra í deildarkeppninni og alla leið í oddaleik gegn Detroit Pistons í undanúrslitum Austurdeildarinnar á dögunum.

Þessi ráðstöfun kemur sumum ef til vill á óvart, því Brown er tiltölulega óreyndur þjálfari og átti það til að gera viðvaningsleg mistök í úrslitakeppninni á dögunum. Hann þykir þó hafa komið liðinu lengra en menn þorðu að vona og sérstaklega þykir hann ná vel til leikmanna. Brown hóf feril sinn í NBA snemma á síðasta áratug þegar hann starfaði sem aðstoðarmaður sem fór yfir myndbandsupptökur hjá liði Denver Nuggets.