Nadal upp að hlið Borg

Spænski tennisleikarinn Rafael Nadal komst í dag upp að hlið sænsku goðsagnarinnar Björns Borg á listanum yfir flesta sigra í röð á leirvelli þegar hann vann sinn 46. leik í röð á slíkum velli og komst í úrslitaleikinn á opna Barcelona-mótinu.

Nadal á þó enn nokkuð í að jafna metið yfir flesta sigurleiki á leir í röð, en það er í höndum Argentínumannsins Guillermo Vilas og er 53 leikir. "Það er gaman að setja met, en það sem skiptir mestu máli fyrir mig er að ná að sigra hverju sinni. Að vera yfir höfuð nefndur á nafn um leið og Björn Borg er þó mikill heiður þó ég eigi langt í land með að komast í sama flokk og maður sem vann á sínum tíma fimm Wimbledon-mót," sagði Nadal.