Olíuverð nálægt sögulegu hámarki

Olíuverð fór í sögulegt hámark í helstu mörkuðum í dag þegar það fór yfir 73 dollara á tunnu. Sérfræðingar spá því að olíuverð haldi áfram að hækka á næstu vikum vegna minni olíubirgða í Bandaríkjunum og óvissu um aðgerðir gegn kjarnorkuáætlun Írana, en það er næststærsta olíuframleiðsluríkið innan OPEC. Þá hafa árásir skæruliða á olíuvinnslustöðvar í Nígeríu dregið mikið úr olíuframleiðslu þar í landi.

Verð á olíu, sem afhent verður í júní, fór í 73,50 dollara á tunnu í rafrænum viðskiptum á mörkuðum í New York í Bandaríkjunum. Í gær fór olían til skamms tíma í 74,50 dollara á tunnu en lækkaði nokkuð eftir því sem leið á daginn. Verð á Norðursjávarolíu, sem afhent verður í júní, lækkaði um 66 sent og fór í 72,52 dollara á tunnu í kauphöllinni í Lundúnum í Bretlandi.

Hugo Chavez, forseti Venesúela, spáði því í gær að verð á olíutunnu muni fara í 100 dollara ákveði Bandaríkjastjórn að grípa til hernaðaraðgerða gegn kjarnorkuáætlun Írana.