Hargreaves vonast eftir landsliðssæti

Enski landsliðsmaðurinn Owen Hargreaves hjá þýsku meisturunum Bayern Munchen segist vonast til að vinna sér sæti í HM-hópi Sven-Göran Eriksson í sumar, en Hargreaves hefur átt við þrálát meiðsli að stríða í vetur eins og svo oft áður og á því sætið alls ekki víst eins og margir af ensku leikmönnunum.

Hargreaves hefur nú náð fullri heilsu á ný og hefur leikið vel í þeim þremur leikjum sem hann hefur komið við sögu í að undanförnu.

"Ég vona sannarlega að Sven taki mig inn í hópinn, því hann hefur alltaf gert það ef ég hef verið heill heilsu og það er því eitthvað fyrir mig til að hlakka til ef vel gengur. Ég hef líklega aldrei verið eins óheppinn með meiðsli eins og í vetur, en nú hef ég náð að spila þrjá leiki í röð og þetta lítur mjög vel út. Ég held að enska landsliðið nú sé án efa það sterkasta síðan ég kom inn um aldarmótin og því met ég möguleika okkar á HM nokkuð góða," sagði Hargreaves.