Hagnaður Milestone tæpir 14 milljarðar

Hagnaður Milestone ehf. nam tæpum 14 milljörðum króna á síðasta ári. Fyrir skatta nam hagnaðurinn 17,8 milljörðum króna. Starfsemi félagsins einkenndist af viðamiklum fjárfestingum og breytingum á efnahagsreikningi félagsins.

Í tilkynningu frá Milestone segir að félagið hafi keypt 66,6 prósenta hlut í Sjóvá-Almennum tryggingum hf. í apríl í fyrra og voru kaupin samþykkt af Fjármálaeftirlitinu í lok júní, en frá þeim tíma varð Sjóvá hluti af samstæðu Milestone. Í lok júní 2005 var hlutafé félagsins aukið um 857 milljónir króna að nafnvirði eða ríflega 7,6 milljarða að markaðsvirði og var hlutaféð greitt inn með peningum annars vegar og hlutabréfum í félögum hins vegar.

Stærstu eignir Milestone eru hlutabréf í Glitni hf.(áður Íslandsbanki hf.) og Sjóvá-Almennum tryggingum hf. Í lok árs var hlutur samstæðunnar í Glitni hf. að nafnvirði tæpa 2,3 milljarða króna. Í janúar 2006 keypti samstæðan hlutabréf í Glitni hf. að nafnvirði 510,7 milljóna króna og tók þátt í hlutafjárútboði þar sem keypt voru hlutabréf að nafnvirði 162,4 milljónir króna. Hagnaður af fjárfestingastarfsemi Sjóvá var góður en jafnframt var nokkur viðsnúningur í vátryggingastarfsemi félagsins. Vonir standa til þess að afkoma vátryggingastarfsemi haldi áfram að batna á þessu ári. Í upphafi árs 2006 keypti Milestone ehf. hlutabréf í Dagsbrún hf. að nafnvirði 715,2 milljónir krónaog ræður samstæðan nú yfir 15,2 prósentum hlutafjár í félaginu.

Í desember 2005 gerði Milestone áskriftar- og hluthafasamning við Baug Group hf. Samkvæmt samningnum mun Milestone framselja eignarhluti sína í Glitni hf. að nafnverði 2,15 milljarðar króna að meðtöldum framvirkum samningum, til Þáttar eignarhaldsfélags ehf., dótturfélags Milestone ehf. Auk þess mun Milestone framselja eignarhlut sinn í Sjóvá til Þáttar. Framsalið er háð samþykki Fjármálaeftirlitsins sem ekki liggur fyrir og því hafa viðskiptin ekki verið bókfærð í ársreikningum félaganna. Samkvæmt samningnum mun eignarhluti Milestone í Þætti lækka í 80 prósent.

Eigið fé móðurfélagsins var í upphafi árs rúmlega 2,9 milljarðar en eigið fé samstæðunnar í lok árs nam ríflega 23,6 milljörðum. Að teknu tilliti til innborgunar hlutafjár á árinu nam arðsemi eigin fjár á árinu 2005 ríflega 207 prósent sem er í samræmi við væntingar hluthafa félagsins. Eiginfjárhlutfall móðurfélagsins í lok ársins var 44,5 prósent og samstæðunnar ríflega 28 prósent, að því er fram kemur í tilkynningu frá félaginu.