Gjaldeyrisjöfnuður bankanna jákvæður

Gjaldeyrisstaða bankanna var jákvæð um tæpa 83 milljarða króna í lok síðasta mánaðar. Þetta er hækkun um 21,7 milljarða króna á milli mánaða, samkvæmt upplýsingum frá Seðlabanka Íslands.

Í hálf fimm fréttum KB banka segir að á síðustu misserum hafi jákvæð gjaldeyrisstaða bankanna vaxið umtalsvert en í lok október var gjaldeyrisjöfnuðurinn jákvæður um rúma 2 milljarða og hefur jákvæð staða hans því hækkað um alls 81 milljarða á síðastliðnum 4 mánuðum.

Reglur Seðlabankans um gjaldeyrisjöfnuð bankanna, sem ætlað er að lágmarka gjaldeyrisáhættu þeirra, eru á þann veg að jöfnuður sérhvers banka má hvorki vera jákvæður né neikvæður um meira en 30% af eiginfjárhlutfalli bankans. Ákveðnar undanþágureglur gera bönkunum þó kleift að verja eiginfjárhlutföll gegn óhægstæðum gengisáhrifum.

Við lok síðasta árs var eigið fé bankanna um 390 milljarðar króna sem þýðir að þeir hafi til samans mátt reka jákvæðan gjaldeyrisjöfnuð upp á 117 milljarða króna. Það er því ljóst að bankarnir eða hluti þeirra eru mjög nálægt þessu 30% hlutfalli nú og má því velta fyrir sér hvort einhver bankanna sé að nýta sér þau undanþáguákvæði sem eru á reglum Seðlabankans. Þetta er heldur ekki ólíklegt í ljósi þess að raungengi krónunnar hefur verið mjög sterkt síðastliðna mánuði sem hefur aukið hættu á veikingu hennar, að því er segir í hálf fimm fréttum KB banka.