Marion skoraði 44 stig fyrir Phoenix

Framherjinn Shawn Marion hjá Phoenix setti persónulegt met í nótt þegar hann skoraði 44 stig í sigri liðsins á Boston 103-94. Marion var í miklu stuði í leiknum og auk þess að skora 44 stig, hitti hann úr 15 af 22 skotum sínum utan af velli, nýtti öll 10 vítaskot sín, hirti 15 fráköst, stal 4 boltum og varði 3 skot.

Boris Diaw var einnig frábær í liði Phoenix og skoraði 21 stig, hirti 9 fráköst og gaf 6 stoðsendingar. Delonte West skoraði 30 stig fyrir Boston og Paul Pierce 20 stig.

Seattle lagði Atlanta á útivelli 114-109. Al Harrington skoraði 24 stig fyrir Atlanta, en Ray Allen skoraði 33 stig fyrir Seattle.

Philadelphia lagði Cleveland 116-107. Allen Iverson skoraði 29 stig og átti 12 stoðsendingar fyrir Philadelphia, en LeBron James skoraði 33 stig fyrir Cleveland.

New Jersey vann Orlando 96-93. Jason Kidd skoraði 28 stig og gaf 11 stoðsendingar hjá New Jersey, en Keyon Dooling var með 23 stig fyrir Orlando.

Miami vann auðveldan sigur á New York 103-83. Dwayne Wade og Jason Williams skoruðu 24 stig hvor fyrir Miami, en Channing Frye skoraði 17 stig og hirti 10 fráköst fyrir New York. Steve Francis var ekki í leikmannahópi New York en verður væntanlega með liðinu í næsta leik eftir að hann kom frá Orlando í skiptum í gærkvöldi.

Utah lagði New Orleans 82-76. Andrei Kirilenko skoraði 17 stig, hirti 11 fráköst og varði 8 skot í liði Utah, en Chris Paul skoraði 18 stig, gaf 7 stoðsendingar og stal 7 boltum fyrir New Orleans.

Houston lagði LA Clippers 106-102. Yao Ming skoraði 29 stig og hirti 15 fráköst fyrir Houston, en Elton Brand skoraði 32 stig og hirti 12 fráköst fyrir Clippers.

Chicago lagði Milwaukee 97-91. Kirk Hinrich skoraði 26 stig fyrir Chicago, en Michael Redd skoraði 30 stig fyrir Milwaukee.

Loks vann Charlotte góðan útisigur á Portland 110-106. Ruben Patterson skoraði 25 stig fyrir Portland, en Kareem Rush skoraði 28 stig fyrir Charlotte.