Indiana - Washington í beinni

Leikur Indiana Pacers og Washington Wizards verður sýndur í beinni útsendingu á NBA TV á Digital Ísland í kvöld og hefst klukkan tólf á miðnætti. Indiana hefur unnið 19 leiki og tapað 14, en Washington hefur unnið 14 og tapað 19. Bæði lið unnu stórsigra í síðasta leik sínum, Indiana valtaði yfir Milwaukee 112-88 og Washington sigraði Atlanta 103-72.

Lið Indiana hefur náð að halda ágætis dampi í deildinni þrátt fyrir nýtt tímabil stóráfalla, en eins og flestir vita hefur Ron Artest ekki spilað með liðinu í nokkrar vikur eftir að hann fór fram á að verða skipt frá liðinu. Þá hefur leikstjórnandinn Jamaal Tinsley misst úr sjö leiki vegna meiðsla, en gæti raunar snúið til baka í kvöld. Jermaine O´Neal er stigahæsti leikmaður Indiana með 20 stig að meðaltali og 9 fráköst.

Indiana vann fyrsta leik liðanna stórt í vetur, en lið Washington hefur valdið nokkrum vonbrigðum eftir gott gengi í fyrra. Gilbert Arenas er stigahæsti leikmaður Washington með 27,5 stig að meðaltali í leik, sem er með því hæsta í deildinni.