Picasso sleginn

Já, það er frábært úrval núna," segir Tryggvi Páll í Gallerí Fold sem mun stjórna glæsilegu listmunauppboði í kvöld í Súlnasalnum.

Meðal verka sem boðin verða upp eru margar perlur: Níu verk eftir Kjarval, fjögur eftir Gunnlaug Scheving, tvö eftir Kristínu Jónsdóttur, þrjú eftir Nínu Tryggvadóttur, svo og verk eftir Ásgrím Jónsson, Jón Engilberts, Júlíönu Sveinsdóttur, Þorvald Skúlason, Gunnlaug Blöndal, Snorra Arinbjarnar, Svavar Guðnason, Karl Kvaran og Mugg. Þá verður boðið upp verk eftir Picasso. Alls verða boðin upp um 140 verk.

Tryggvi segist aðspurður ekki vita hvernig stendur á því að svo mikið framboð er núna en mikil dreifing er á því hvaðan þau koma. En eitthvað sé um að verkin komi úr dánabúum sem gæti stutt þá kenningu að kynslóðin sem var að kaupa meistarana í fyrstu sé að falla frá. Og markaðurinn muni sjá meiri dýrgripi en verið hefur. „Þetta gengur í sveiflum. En áhuginn hefur verið að aukast," segir Tryggvi í Fold sem heldur nú sitt fimmta málverkauppboð þetta árið.

Aðspurður um Picasso-verkið sérstaklega segir Tryggvi Páll það vera þrykk. „Já, þetta er grafík. Nei, ekki er það nú algengt að verk eftir Picasso séu á uppboði hérlendis."

Tryggvi Páll segir reyndar nokkuð um að grafíkverk eftir Picasso hafa verið á uppboðum í Danmörku. Og hann megi kaupa fyrir ekki óyfirstíganlegt verð í galleríum bæði í Frakklandi og Spáni.

„En vissulega er gaman að eiga verk eftir meistarann. Sjálfur á ég reyndar tvö þrykk eftir Picasso án þess að það komi þessu við. Þetta verk er nú bara í eigu einstaklings og hann hefur líklega eignast þetta þannig.

Uppboðshaldarinn snjalli segir erfitt að segja til um hvaða verk sem hann hefur boðið upp í gegnum tíðina sé dýrast. Verðlag sé hér svo breytilegt. En nefnir þó að nýverið seldi hann vantslitamynd eftir Ásgrím á yfir fimm milljónir.

„Trúlega það dýrasta. Og, nei, Picasso-myndin fer örugglega ekki það."