Hafa lokið þéttingu nets

Vodafone hefur lokið við að fjölga GSM-sendum og þétta kerfi sitt víðs vegar á höfuðborgarsvæðinu. Aðgerðina segir fyrirtækið til komna vegna síaukinnar notkunar í símkerfi fyrirtækisins.

„Fyrirtækið hefur nú lokið við að setja upp GSM-senda í Hraunbæ, Ártúnsholti og í Smiðjuhverfi,“ segir í tilkynningu og tekið fram að eins sé kominn nýr GSM-sendir við Skeiðaafleggjara á Suðurlandsvegi. „Enn fremur er unnið að því að fjölga sendum í Norðlingaholti auk svæða austan Markarfljóts og í Borgarnesi,“ segir Vodafone.