Stakk mann fimm sinnum

Rúmlega tvítugur karlmaður var á föstudaginn dæmdur til tólf mánaða fangelsisvistar í Héraðsdómi Reykjavíkur fyrir að stinga annan mann fimm sinnum. Þar af eru níu mánuðir dómsins skilorðsbundnir.

Mönnunum tveimur hafði lent saman inni á skemmtistaðnum Gauki á Stöng í mars á þessu ári. Þeim átökum lauk með því að fórnarlambinu var vísað út af skemmtistaðnum. Hinn ákærði fylgdi eftir stuttu síðar og veittist þá fórnarlambið að honum að nýju. Slagsmálin leiddust inn í sund á bak við nærliggjandi veitingastað og er talið að ákærði hafi stungið manninn þar fimm sinnum með litlum vasahnífi. Fórnarlambið hlaut fjögur stungusár á baki og eitt í síðu. Stungurnar ristu þó grunnt og maðurinn var útskrifaður af spítala daginn eftir.

Í niðurstöðu héraðsdóms kom fram að hinn ákærði hefði verið undir áhrifum fíkniefna þegar hann framdi brot sitt. Hann hafi sýnt mikla iðrun frá því að atburðurinn átti sér stað og sýnt vilja til að taka sig á. Hann hefði meðal annars látið af fíkniefnaneyslu, væri kominn í sambúð og hefði leitað sér aðstoðar geðlæknis. Þá væri það honum til refsilækkunar að afleiðingar árásarinnar voru ekki alvarlegar.

Auk fangelsisdómsins var maðurinn dæmdur til að greiða fórnarlambi sínu á fjórða hundrað þúsund krónur í skaðabætur.