HoF rekið með tapi

Vöruhúsakeðjan House of Fraser, sem Baugur, FL Group og fleiri fjárfestar hyggjast yfirtaka, tapaði 11,6 milljónum punda á fyrri hluta rekstrarársins sem lauk í júlí. Samsvarar tapið rúmum 1,5 milljörðum króna og jókst um 275 prósent á milli ára.

HoF skilaði hins vegar um 1,4 milljarða króna rekstrarhagnaði fyrir afskriftir (EBITDA) og jókst hann um rúm níu prósent á milli ára.

Einskiptiskostnaður vegna endurbóta á nýjum verslunum skýra það tap sem varð. Uppgjörið ber með sér að framlegð batnar á milli ára og sala eykst vegna fjárfestinga.

Afkoman er í takt við væntingar stjórnenda HoF sem höfðu spáð því að fyrri hluti ársins yrði erfiður á breskum smásölumarkaði. Það kom síðar á daginn.