Um 40 milljarða tilboð í Icelandair

FL Group hefur til skoðunar tvö tilboð í flugfélagið Icelandair. Annað tilboðið er frá KB banka sem vill kaupa félagið í samvinnu við Ker, félag Ólafs Ólafssonar, eiganda Samskipa.

Hitt tilboðið er frá Glitni, en félög sem stóðu saman að Vátryggingafélagi Íslands áður en Exista keypti félagið vinna með Glitni að tilboðinu. Fyrir þeim hópi fara Finnur Ingólfsson og Þórólfur Gíslason, kaupfélagsstjóri Kaupfélags Skagfirðinga.

Þessir tveir hópar unnu saman á sínum tíma að kaupum á hlut ríkisins í Búnaðarbanka Íslands, en nú stefnir í samkeppni milli þeirra um kaup á Icelandair.

Samkvæmt heimildum markaðarins er ánægja með tilboðin innan FL Group og ljóst að verulegur hagnaður mun myndast frá bókfærðu virði við kaupin. Ekki fengust uppgefnar fjárhæðir í því sambandi, en tölur nálægt fjörutíu milljörðum króna þykja ekki fjarri lagi. FL myndi með sölu innleysa hagnað upp á um þrjátíu milljarða króna. Samkvæmt heimildum hljóða tilboðin upp á greiðslu með peningum, en ekki með skiptum á hlutabréfum eins og væntingar hafa verið um á markaði.

Talið er að með þessu hafi FL tekið stefnu á að minnka hlut sinn í flugrekstri, en félagið á Sterling flugfélagið, auk hlutar í Finnair. Forsvarsmenn Sterling telja að félagið muni skila rekstrarhagnaði í ár, en slíkt þykir ganga kraftaverki næst miðað við þær væntingar sem sérfræðingar gerðu sér þegar félagið var keypt.