Hlutur Fons í sölumeðferð

Tæplega 62 prósenta hlutur Fons Eignarhaldsfélags, sem er í eigu þeirra Pálma Haraldssonar og Jóhannesar Kristinssonar, í Plastprenti, er nú í sölumeðferð hjá MP Fjárfestingabanka hf.

Plastprent hf. framleiðir plastumbúðir og plastfilmur og býður þar að auki skyldar vörur til reksturs og endursölu. Fyrirtækið velti um tveimur og hálfum milljarði króna árið 2005. Sífellt stærri hluti af starfsemi Plastprents hefur farið fram erlendis en undanfarin ár hefur félagið byggt upp starfsemi í Lettlandi og Litháen. Þá stendur yfir áreiðanleikakönnun vegna kaupa fyrirtækisins á verksmiðju í Makedóníu. Áætlaður vöxtur Plastprents erlendis er um 20 til 30 prósent á ári og horfur eru á að tæplega helmingur tekna fyrirtækisins komi erlendis frá á þessu ári.