Fyrsta tap Valsstúlkna

Kvennalið Vals tapaði sínum fyrsta leik í DHL-deild kvenna í handknattleik í dag þegar liðið lá fyrir FH í Laugardalshöllinni, 26-23. Valur var yfir í hálfleik 14-12, en FH hafði betur í síðari hálfleiknum og vann sinn annan leik í röð, eftir að hafa tapað tveimur fyrstu leikjum sínum á mótinu. Maja Gronbæk var markahæst í liði FH og skoraði 8 mörk, en Ágústa Edda Björnsdóttir skoraði 9 mörk fyrir Val. Þá vann ÍBV auðveldan sigur á Víkingi í Vestmannaeyjum 29-17. Simona Vintila skoraði 7 mörk fyrir ÍBV, en þær Sigrún Brynjólfsdóttir og Natasha Damljanovic skoruðu 4 hvor fyrir Víking. Að lokum vann Grótta góðan sigur á KA/Þór, 32-24 á Seltjarnarnesi.