Óvíst með Indriða

Óvíst er hvort Indriði Sigurðsson geti spilað með íslenska landsliðinu í knattspyrnu gegn Pólverjum á morgun. Indriði æfði ekki með liðinu í morgun þar sem hann er með hálsbólgu. Leikurinn fer fram í Varsjá klukkan 15 á morgun og er sýndur beint á Sýn. Logi Ólafsson landsliðsþjálfari sagði óvíst hvort Indriði yrði til í slaginn. Ferðalag íslensku landsliðsmannanna tók lengri tíma en reiknað var með í upphafi. Flug frá Kaupmannahöfn til Varsjár var fellt niður og því varð hópurinn að fljúga frá Kaupmannahöfn til Berlínar og þaðan til Varsjár. Farangur liðsins varð eftir í Kaupamannahöfn og það var ekki fyrr en klukkustund fyrir æfingu í morgun að farangur liðsins skilaði sér til Varsjár. Landsliðið æfir aftur síðdegis í dag.