Ísland leikur við Færeyjar

Undirbúningur handboltalandsliðsins fyrir umspilsleikina gegn Hvít-Rússum um sæti á EM í Sviss á næsta ári fer að hefjast enda verður leikið við Rússana í næsta mánuði. Fyrsti liður í undirbúningnum eru tveir landsleikir við Færeyinga ytra 21. og 22. maí. "Ég mun eingöngu velja þá leikmenn sem spila hér heima og uppistaðan í liðinu verða leikmenn í U-21 árs liðinu," sagði Viggó Sigurðsson landsliðsþjálfari við Fréttablaðið í gær en ívið stærra verkefni tekur við í kjölfar Færeyjaferðarinnar. "Svíarnir koma í byrjun júní en ég fæ liðið saman í lok maí en þá er keppnistímabilunum í Evrópu lokið, þannig að okkar sterkustu menn munu leika gegn Svíum. Hvít-Rússaleikirnir koma svo í kjölfarið þannig að undirbúningurinn sem við fáum er mjög góður," sagði Viggó Sigurðsson.