E-vítamín slær á tíðaverkina

E-vítamín getur stytt lengd tíðaverkja og dregið verulega úr þeim samkvæmt nýrri rannsókn sem sagt er frá í tímaritinu British Journal of Obstetrics and Gynaecology. Tíðarverkir, sem þekktir eru undir læknaheitinu dysmenorrhoea, hafa einkum áhrif á unglingsstúlkur og geta truflað daglegt líf þeirra í nokkra daga. Rannsókn þessi var gerð af háskólanum Tarbait Modarres í Íran og voru það tæplega 280 stelpur á aldrinum fimmtán og sautján sem þjáðust af tíðaverkjum sem tóku þátt. Þær sem tóku E-vítamín tvisvar á dag fundu fyrir minni tíðaverkjum og tíðablóðið var einnig minna en vanalega. Þessi lausn fyrir stúlkur sem þjást af tíðaverkjum er afar sniðug því hún er ódýr, henni fylgja engar aukaverkanir og þurfa stúlkurnar ekki að taka inn nein hormón eða verkjalyf samfara E-vítamíni. Sérfræðingar í Bretlandi segja þessa rannsókn marka tímamót og geti hjálpað þúsundum ungra stúlkna.