Dómgæslan var hrikaleg

Valsmenn eru komnir áfram í undanúrslit DHL-deildar karla í handbolta eftir sigur á HK, 31-30, í þriðja leik liðanna í átta liða úrslitum í Valsheimilinu í gær. Valsmenn mæta Haukum í undanúrslitum en Haukar lögðu FH-inga að velli í tveimur leikjum. Valsmenn höfðu tögl og haldir nær allan leikinn og leiddu með átta mörkum í hálfleik, 21-13 . Sama sagan var uppi á teningnum fyrstu tuttugu mínútur síðari hálfleiks. Valsmenn leiddu með sjö mörkum, 30-23 og ekkert virtist geta komið í veg fyrir sigur þeirra. Þá settu HK-menn hins vegar í fluggír, lokuðu vörninni og söxuðu hressilega á forskot Valsmanna. Þeir skoruðu sex mörk í röð og þegar sex mínútur voru til leiksloka höfðu þeir minnkað muninn niður í eitt mark, 30-29. Þeir komust hins vegar ekki nær og Valsmenn hrósuðu sigri eftir æsispennandi lokamínútur."Við spiluðum frábærlega í fyrri hálfleik en síðan náðu við ekki leysa vörnina hjá þeim í seinni hálfleik. Mér fannst þeir fá að spila alltof fast í vörninni og ég verð að segja að dómgæslan var hrikaleg," sagði Óskar Bjarni Óskarsson, þjálfari Valsmanna, eftir leikinn.Björgvin Páll Gústavsson, markvörður HK, var hundsvekktur eftir leikinn og sagði það ekki ganga að spila bara af fullum krafti í einn hálfleik. "Við mættum ekki tilbúnir og það er fáranlegt að lið eins og við skulum fá okkur 21 mark í einum hálfleik. Við getum kennt sjálfum okkur um þetta," sagði Björgvin Páll