Meiri bókaafsláttur en í fyrra

Afsláttur á bókum virðist meiri í ár en undanfarin ár, segir Hrannar B. Arnarsson, markaðsstjóri bókaútgáfunnar Eddu. "Ég skýri það með því að jólabækurnar eru einfaldlega meira freistandi en oft áður og þar af leiðandi stífari ásókn smásöluaðilanna að ná af þeirri köku. Þeir virðast nota verðið til þess," segir hann. "Ég get staðfest að þess eru dæmi að endursöluaðilar hafi gefið meiri afslátt en þeir hafa verið að fá hjá okkur." Hrannar segir þetta hvorki koma niður á rithöfundum né bókaútgáfum. "Þegar endursöluaðilarnir eru að gefa þetta af sinni álagningu og jafnvel gott betur þá eru það þeir sem bera kostnaðinn."