Varað við umferð um jökulinn

Fyrir liggur að örar breytingar eru á gosinu við Grímsvötn samkvæmt tilkynningu frá Björgunarmiðstöðinni Skógarhlíð. Almannavarnadeild Ríkislögreglustjóra varar við umferð um jökulinn í ljósi þess að jökullinn er sprunginn og stórhættulegur yfirferðar. Í tilkynningunni segir að svo virðist sem komið sé upp gos á öðrum stað í Grímsvatnadældinni. Það er líka áréttað að hættulegt er að vera í gosmekkinum.    Búist er við að vísindamenn, sem skoðað hafa eldstöðina við Grímsvötn úr lofti nú síðdegis, komi í björgunarmiðstöðina klukkan 18 og munu þá ræða við fjölmiðla.