Kjartan Henry kallaður inn í landsliðið

Kjartan Henry Finnbogason kemur inn í íslenska karlalandsliðið í fótbolta fyrir leikinn á móti Kósóvó á mánudagskvöldið en þetta staðfestir framherjinn í viðtali á heimasíðu danska félagsins Horsens.

Kjartan Henry kemur inn í liðið vegna þess að Björn Bergmann Sigurðarson er að glíma við meiðsli. Kjartan verður þó væntanlega ekki með íslenska liðinu í kvöld þegar liðið mætir Tyrklandi út í Tyrklandi.

Stort tillykke til @kjahfin, der er blevet udtaget til VM-kvalifikationskampen mod Kosovo  https://t.co/1PD8p6eNUzpic.twitter.com/QQzZ1qKyUU

— AC Horsens (@ACHorsensGULE) October 6, 2017

Kjartan Henry fékk símtal frá landsliðsþjálfaranum Heimi Hallgrímssyni í gær og flaug út í dag.

„Landsliðsþjálfarinn hringdi í mig í gær vegna þess að það eru átta leikmenn í hættu á að fara í leikbann eftir leikinn gegn Tyrklandi. Ég flýg til Tyrklands í dag og á morgun er æfing fyrir þá sem spila ekki í kvöld," sagði Kjartan við heimasíðu Horsens.

Kjartan Henry hefur spilað vel með Horsens liðinu á þessu tímabili og með fjögur mörk og eina stoðsendingu í ellefu leikjum í dönsku úrvalsdeildinni á þessu tímabili.

Leikurinn við Kósóvó á mánudagskvöldið verður lokaleikur íslenska liðsins í undankeppninni en mikilvægt er að íslensku strákarnir nái góðum úrslitum í Tyrklandi í kvöld eigi liðið að stíga skref í átt að HM í Rússlandi í Kósóvó-leiknum.