Sex­tán í bann fyrir nasistakveðjur

Í yfirlýsingu ítölsku lögreglunnar kemur fram að stuðningsmennirnir hafi verið í Curva Sud, suðurstúkunni á Ólympíuleikvanginum í Róm, en þar koma blóðheitustu stuðningsmenn Roma, ultras, saman.

Fram kemur að einstaklingarnir sextán séu á milli 19 og 42 ára gamlir og þeir hafi saman sýnt svokallaða „rómanska kveðju“ sem teknar voru upp af fasistum í stjórnartíð Benito Mussolini og nasistum undir Adolf Hitler snemma á 20. öldinni.

Einnig hafi þeir klæðst peysum sem hafi verið áletraðar með orðunum uber alles, þýskum frasa sem þýðir „ofar öllum öðrum“ – sem lögreglan lýsir sem „vel þekktri nasistakveðju“.

Einstaklingarnir fara í bönn frá einu ári upp í fimm ár sem gilda á öllum fótboltavöllum Ítalíu auk allra valla sem Roma eða ítalska landsliðið leika á utan landssteinanna.

Fjórir þeirra sextán sem fara í bann þurfa þá að skrá sig inn á lögreglustöð í Rómarborg fyrir og eftir leiki til að sýna fram á að þeir séu ekki á leikjum Roma.

Þeir sem fara í lengri bönn fá þau vegna fyrri brota. Þó nokkrir af einstaklingunum sextán hafa áður fengið bönn vegna „vopnahalds, hótana, skemmdarverka, slagsmála og smygls“ segir ítalska lögreglan.

Einstaklingarnir voru dæmdir í bann á grundvelli Mancino-laganna á Ítalíu, sem leidd voru til laga árið 1993 í tíð Nicola Mancino sem innviðaráðherra. Lögin miða að því að refsa fyrir mismunun á grundvelli kynþáttar, þjóðernisuppruna, trúarbragða, hatursorðræðu og ofbeldisfulla hatursglæpi.