Elías Rafn hélt hreinu og Midtjylland í kjörstöðu

Markvörðurinn stóð allan leikinn í marki danska liðsins og hélt hreinu þegar Midtjylland tók mikilvægt skref í átt að sæti í deildarkeppni Sambandsdeildarinnar. Elías Rafn hefur verið fastur maður í marki Midtjylland í Evrópuleikjum liðsins og var aftur treyst fyrir verkefninu gegn króatíska liðinu.

Midtjylland náði forystunni á 20. mínútu þegar Cho Gue-sung kom heimamönnum yfir. Danska liðið bætti síðan öðru marki við snemma í síðari hálfleik og hélt tveggja marka forystunni út leikinn.

Elías Rafn hefur verið í góðu formi undanfarið og lék meðal annars 90 mínútur í 1-1 jafntefli gegn Lyngby um síðustu helgi.

Midtjylland fer því með 2-0 forskot til Króatíu fyrir síðari leikinn gegn Rijeka, sem fram fer 27. ágúst.