Henderson tjáir sig í fyrsta sinn eftir fallið vand­ræða­lega

„Tími til að undirbúa okkur fyrir stóra leikinn á laugardag,“ er það fyrsta sem heyrist frá Henderson eftir fallið vandræðalega. Jordan Henderson sjálfur mun þó ekki geta hjálpað Englandi á vellinum í átta liða úrslitunum gegn Noregi.

Meiðslin sem miðjumaðurinn hlaut eftir sigurinn á Mexíkó á Azteca-leikvanginum – þegar hann ætlaði að stökkva yfir auglýsingaskilti og datt beint á handlegginn – enduðu með því að hann þurfti á súrefnisgrímu að halda og sjúkrahúsvist.

Þar með er heimsmeistaramótinu lokið fyrir þennan 36 ára gamla leikmann en Henderson verður áfram í bækistöðvum landsliðsins í Kansas City til að styðja liðsfélaga sína í gullleitinni.

„Takk til alls starfsfólksins sem annaðist mig á sjúkrahúsinu í Kansas City. Sérstaklega skurðlæknanna þriggja sem framkvæmdu aðgerðina,“ skrifar Henderson í færslu á Instagram. Hann nefnir þá líka á nafn: Dr. Kenneth P. Unruh, Dr. Mark J. Winston og Dr. Kirk McCullough.

Faðir Jordans, Brian, varð vitni að atvikinu í leiknum úr sjónvarpssófanum heima í Englandi. Hann varð áhyggjufullur þegar hann sá son sinn borinn burt á meðan sigurviðtal við Harry Kane stóð yfir.

„Fyrst hélt ég að hann hefði bara dottið,“ sagði Brian við Daily Mail og heldur áfram:

„Hann gjörsamlega mölbraut framhandlegginn. Hann verður settur í gifs og svo sjáum við hvað sérfræðingarnir segja,“ sagði Brian.

Landsliðsþjálfarinn Thomas Tuchel staðfesti að Henderson hefði verið fluttur á sjúkrahús og bætti við: „Það dró svolítið úr gleðinni yfir kvöldinu,“ sagði Tuchel.