Rodri skammaðist sín og baðst fyrir­gefningar

Silva kom inn á sem varamaður á 83. mínútu og átti eina hættulegustu tilraun Portúgals þegar skalli hans fór rétt yfir mark Spánverja.

Þar sem að Silva lá á vellinum eftir skallann kom Rodri og fagnaði með ýktum hætti í átt að honum, standandi fyrir ofan liðsfélaga sinn til sjö ára. Þessu tók Silva skiljanlega illa og áttu þeir í orðaskaki.

Eftir leik baðst Rodri afsökunar en þeir Silva hafa verið samherjar hjá City frá árinu 2019 og fagnað fjölda titla saman. Silva er núna genginn í raðir Real Madrid en Rodri ætlar að ákveða sitt framhald eftir HM.

„Það fyrsta sem ég vil gera er að biðjast afsökunar því ég hagaði mér ekki með réttum hætti gagnvart liðsfélaga mínum,“ sagði Rodri.

„Það var náttúrulegt hjá mér að fagna því að hann klikkaði en það var rangt af mér. Ég bað hann afsökunar og ég biðst aftur afsökunar núna,“ sagði Rodri.

Rodri var valinn maður leiksins en sagði að Mikel Merino, sem kom inn á og skoraði eina mark leiksins, hefði frekar átt skilið verðlaunin. „Ef að menn koma inn með réttu hugarfari eiga þeir skilið að vera valdir maður leiksins. Ég hefði veitt honum verðlaunin. Frammistaða allra var eftirminnileg,“ sagði Rodri auðmjúkur.