Hender­son meiddist illa á hendi í fagnaðar­látunum: „Þetta lítur illa út“

Þrátt fyrir að vera manni færri nær allan seinni hálfleikinn unnu Englendingar 2-3 sigur á Mexíkóum á þeirra heimavelli.

Í leikslok fögnuðu Englendingar sigrinum vel og innilega en ekki sluppu allir ómeiddir frá fagnaðarlátunum. Henderson féll nefnilega við þegar hann stökk yfir auglýsingaskilti og lenti illa á vinstri hendinni. Hann var í kjölfarið borinn af velli.

„Jordan datt bara og meiddist á úlnlið. Þetta lítur illa út. Þetta er frekar alvarlegt og það er ekki í takti við kvöldið að Jordan sé ekki með okkur. Læknirinn sagði mér að hann væri á spítala,“ sagði Tuchel eftir leikinn.

Henderson hefur aðeins leikið sex mínútur á HM til þessa, gegn Panama í lokaleik riðlakeppninnar.

England mætir Noregi í Miami í átta liða úrslitum HM á laugardaginn kemur.