Úr­slitein­vígið hefst í kvöld: Mun tala sinn skít ef þess er þörf

Kane, sem er algjör lykilmaður í liði Grindavíkur og einn besti leikmaður Bónus deildarinnar settist niður með Stefáni Árna Pálssyni í HS-orku höllinni í Grindavík og rýndi í stöðuna fyrir leik eitt.

„Ég er fullur sjálfstrausts,“ byrjaði Kane svar sitt við fyrstu spurningu Stefáns og líklegast ekki oft, ef einhvern tímann, sem Kane hefur skort sjálfstraust.  

„Við höfum unnið þetta lið áður. Við töpuðum fyrir þeim í Síkinu fyrr á tímabilinu en vorum ekki upp á okkar besta þar en unnum næstum því leikinn. Svo hér í Grindavík, án mín, Breka og fleiri leikmanna unnum við þá örugglega með yfir tuttugu stigum. Við vitum að Tindastóll er með gott lið. Þeir eru að spila á háu gæðastigi þessa stundina, eru vel þjálfaðir og með nokkra góða leikmenn. En ef við höldum áfram að standa okkur vel, sér í lagi í varnarleiknum, þá verður þetta allt í góðu fyrir okkur í þessu einvígi.“

Aðspurður um stöðuna á sér þegar að svona langt er liðið á úrslitakeppnina sagði Kane hana vera góða.

„Eins og ég hef sagt við strákana. Nú er ekki tíminn til þess að kvarta undan einhverjum smávægilegum meiðslum. Þú verður að berjast í gegnum þau. Halda áfram að keyra á þetta.“

Með heimavallarréttinn

Lið Grindavíkur vann deildarkeppni Bónus deildarinnar og er því með heimavallarrétt í úrslitaeinvíginu. En hversu mikilvægur er heimavallarrétturinnn að mati Kane?

„Mjög mikilvægur. Með því að taka leik eitt gefum við okkur tækifæri á því að halda í Síkið og reyna komast í 2-0. Fáum þá tækifæri á því að loka einvíginu næst þegar að við komum til Grindavíkur. Það er erfitt að spila við okkur hér. Fyrir Tindastól að þurfa að keyra hingað í yfir fjóra tíma og mæta okkur í leik sem spilaður er á háu tempói. Það er dálítið okkur í hag. Heimavallarrétturinn er gífurlega mikilvægur.“

„Basile er minn maður“

Í liði Tindastóls mætir Kane sínum gamla liðsfélaga, Dedrick Basile, en þeir spiluðu saman á fyrsta ári Kane hér á landi.

„Það verður mjög gaman. Við spiluðum saman hér þegar að ég kom fyrst til Íslands. Við fórum alla leið í úrslitaeinvígið og töpuðum í oddaleik fyrir Val þar sem að Taiwo Badmus var að spila. Nú eru þeir saman í liði. Basile er minn maður. Frábær leikmaður sem hefur staðið sig vel fyrir félagið. Hann er búinn að vera frábær í úrslitakeppninni.“

Vinskapurinn verður hins vegar lagður til hliðar í úrslitaeinvíginu. Kane er þekktur fyrir að reyna brjóta niður andstæðinga sína, ekki bara inn á vellinum með hæfileikum sínum í körfubolta. Heldur einnig í gegnum sálfræðistíl þar sem Kane getur verið að láta menn heyra það í tilraun sinni til þess að komast inn í hausinn á þeim. 

„Basile fær ekkert gefins hjá mér. Ég gæti talað smá skít við hann fyrir leik og á meðan að leik stendur. Það er bara það sem ég geri. Þannig er ég bara og það hjálpar mér við að ná mér í gang. Ef þörf er á mun ég klárlega tala minn skít við hann.“

Leikur eitt í úrslitaeinvígi Grindavíkur og Tindastóls hefst klukkan korter yfir sjö í kvöld í HS-orku höllinni í Grindavík og verður sýndur í beinni útsendingu á Sýn Sport Ísland. Upphitun fyrir leik með Stefáni Árna og sérfræðingum hans hefst klukkan hálf sjö.