Annað liðið á tveimur dögum sem kemur til baka eftir að hafa lent 3-1 undir

Aðeins fimmtán lið í sögu NBA hafa komið til baka eftir að hafa lent 3-1 undir í einvígi og komist áfram. Það hefur nú gerst tvisvar sinnum á tveimur dögum því á laugardaginn sigraði Philadelphia 76ers Boston Celtics í oddaleik, 100-109, og komst áfram þrátt fyrir að hafa lent 3-1 undir í rimmu liðanna.

Cade Cunningham skoraði 32 stig fyrir Detroit gegn Orlando og gaf tólf stoðsendingar. Tobias Harris skoraði þrjátíu stig og tók níu fráköst. Paolo Banchero var með 38 stig, níu fráköst og sex stoðsendingar hjá Orlando.

Detroit er því komið í undanúrslit Austurdeildarinnar í fyrsta sinn síðan 2008. Eftir erfið ár hefur landið risið hjá liðinu og á síðasta tímabili komst það í úrslitakeppnina í fyrsta sinn síðan 2019. Í vetur vann liðið svo sextíu leiki og endaði í efsta sæti Austurdeildarinnar.

Í undanúrslitunum mætir Detroit Cleveland Cavaliers sem vann Toronto Raptors í oddaleik, 114-102. Allir sjö leikirnir í einvíginu unnust á heimavelli.

Jarrett Allen skoraði 22 stig fyrir Cleveland og tók nítján fráköst. Donovan Mitchell skoraði einnig 22 stig. Scottie Barnes var með 24 stig og níu fráköst hjá Toronto og RJ Barrett skilaði 23 stigum.