Strákarnir okkar mæta Messi fyrir HM

Um er að ræða risavaxið verkefni en Argentína býr sig undir komandi heimsmeistaramót sem gæti verið það síðasta á ferli goðsagnarinnar Lionels Messi. Leikur Íslands og Argentínu fer fram á Jordan Hare-vellinum í Auburn í Alabama þann 9. júní samkvæmt tilkynningu KSÍ.

Leikurinn verður sá síðasti hjá argentínska landsliðinu fyrir HM þar sem liðið á titil að verja eftir að hafa orðið heimsmeistari á HM í Katar árið 2022.

Liðin mætast þar í annað sinn í sögunni en þau áttust við á HM 2018 þar sem þau skildu jöfn 1-1. Alfreð Finnbogason skoraði mark Íslands og Hannes Þór Halldórsson varði vítaspyrnu frá Messi, líkt og frægt er.

Mikið ferðalag verður á íslenska liðinu en níu dögum fyrr, þann 31. maí, mæta strákarnir Japan í Tókýó.

Argentína verður í riðli með Alsír, Jórdaníu og Austurríki á komandi heimsmeistaramóti.