Ítalskur her­maður fylgdist með æfingu Bosníu fyrir um­spils­leikinn

Fyrstu fimmtán mínúturnar af æfingu bosníska liðsins í Butmir voru opnar fyrir fjölmiðla. Maður einn fylgdist þó lengur með æfingunni og myndaði hana. Honum var á endanum vísað í burtu af svæðinu.

Bosnískir fjölmiðlar töldu að Ítalir hefðu sent manninn til að njósna um bosníska liðið fyrir leikinn mikilvæga í Zenica í kvöld.

Svo reyndist þó ekki vera því maðurinn með myndavélina er ítalskur hermaður sem er staddur í Bosníu vegna verkefnis á vegum Evrópusambandsins, EUFOR.

Bosníumenn kvörtuðu til EUFOR sem staðfesti að ítalska knattspyrnusambandið hefði ekkert vitað af hermanninum. Hann var einfaldlega í Butmir fyrir tilviljun og ákvað að mynda æfinguna af einskærri forvitni.

Ítalir tryggðu sér sæti í úrslitaleiknum í umspilinu með 2-0 sigri á Norður-Írum á fimmtudaginn. Bosnía vann hins vegar Wales í vítaspyrnukeppni sama dag.

Ítalska liðið freistar þess nú að komast á HM eftir að hafa misst af mótunum í Rússlandi 2018 og Katar 2022. Ítalía varð heimsmeistari 2006 en komst ekki upp úr riðlakeppninni á HM 2010 og 2014.

Liðið sem vinnur leikinn í Zenica lendir í riðli með Kanada, Katar og Sviss á HM.